ტელეკომოპანია „იმედზე“ ვახო სანაიას ახალი გადაცემა „ღია ეთერი“ იწყება. გადაცემის დაწყების ზუსტი თარიღი არაა ცნობილი, თუმცა იგეგმება, რომ პირველი გამოშვება ეთერში თებერვალში მოხვდეს. საზოგადოებრივ-პოლიტიკური ტოქშოუ „ღია ეთერი“ ყოველ პარასკევს 22 საათზე გავა ეთერში და კვირის მნიშვნელოვან საზოგადოებრივ პოლიტიკურ თემებს დაეთმობა. "ღია ეთერის" პრომო ვიდეო უკვე გადის "იმედის" ეთერში. 

გადაცემის ავტორი და წამყვანი იქნება ვახო სანაია, მისი მთავარი პროდუსერი კი სოფო კვინტრაძე. ვახო სანაიას თქმით, გადაცემის შექმნაში აქტიურად მონაწილეობს არხის საინფორმაციო სამსახურის ხელმძღვანელი ბაია ცანავა. „ღია ეთერში“ სტუმრები კვირის აქტუალურ თემებზე დებატებს გამართავენ.  

„გადაცემის ფორმატიდან გამომდინარე, იქნებიან მთავარი სტუმრები, იქნება აქტიური დარბაზი, ინტერაქტივი და შევეცდებით სცოიალური ქსელების საშუალებით მაყურებელთა აზრი გავიგოთ“, - განუცხადა ბაია ცანავამ Media.Ge-ს.

ცანავას თქმით, სანაიას თოქ-შოუს გარდა არხზე იგეგმება სხვა საზოგადოებრივ-პოლიტიკური გადაცემების დაწყებაც.

სანაია აქამდე საზოგადოებრივ მაუწყებელში გადაცემებს - „ევროპულ არჩევანს“ და „ვახო სანაიას რეპორტაჟს“ ამზადებდა. მასთან და გადაცემა „ვახო სანაიას რეპორტაჟის“ სხვა თანამშრომლებთან საზოგადოებრივმა მაუწყებელმა კონტრაქტები 2012 წლის 9 ოქტომბერს, საპარლამენტო არჩევნების შემდეგ გაწყვიტა. როგორც ვახო სანაია მაშინ აცხადებდა, ამის მიზეზი სანაიასა და ხელმძღვანელობის მოსაზრებების შეუთანხმებლობა გახდა. 2012 წლის 19 სექტემბერს ვახო სანაია მაუწყებლის კიდევ ერთ წამყვანთან, ეკა კვესიტაძესთან ერთად სტუდენტების აქციას შეუერთდა და მაუწყებლისგან პატიმართა წამების კადრების გაშუქებას, ასევე ამ თემაზე გადაცემების მომზადებას ითხოვდა.

რაც შეეხება „იმედს“, მას შემდეგ რაც ტელეკომპანია პატარკაციშვილების ოჯახს გადაეცა, არხზე რეორგანიზაციის პროცესი დაიწყო, რის შემდეგაც მხოლოდ ტექნიკური პერსონალი და რამდენიმე სტაჟიორი დარჩა. დაიხურა უცხოეთის ბიუროები. განახლებული „იმედი“ ეთერში „ღია ეთერით“ დაბრუნდა. არხზე განახლდა საინფორმაციო გამოშვება - „ქრონიკა“. ახალი კადრების მიერ მომზადებული საინფორმაციო გამოშვება პირველად 3 დეკმებერს გავიდა ეთერში.  მას შემდეგ დილის 9 საათიდან მაყურებელს 3 საათიანი ინტერვალებით აწვდიან ახალ ამბებს, შემაჯამებელი გამოშვება 20:00 საათზე გადის.