უშიშროების საბჭოს თავისუფალი და სამართლიანი არჩევნების უწყებათაშორის კომისია მედია საშუალებებს კოლეგების დევნის შეწყვეტისკენ მოუწოდებს. ამის შესახებ კომისიამ განცხადება 9 აგვისტოს გაავრცელა.

დოკუმენტში აღნიშნულია, რომ ზოგიერთი მედია საშუალების ქმედება პოლიტიკური პარტიების ლიდერებისა და მათი აქტივისტების შეხვედრების გაშუქებისას, ისევე როგორც ამ საინფორმაციო საშუალებების მიმართ განსხვავებული სარედაქციო პოზიციის მქონე ჟურნალისტთა ქმედებები ნორმალურ წინასაარჩევნო ატმოსფეროს საფრთხეს უქმნის.

სავარაუდოდ, განცხადებაში საუბარია ინციდენტებზე, რაც სააგენტო „ინფო 9“-სა და ტელეკომპანია „მეცხრე არხის“ რეგიონულ ჟურნალისტებს მიკროფონითა და კამერით აღჭურვილ პირებთან შეექმნათ. ეს ადამიანები პერიოდულად თან დაჰყვებიან „ინფო 9“-სა და „მეცხრე არხის“ ჟურნალისტებს, მათ მუშაობაში ხელს უშლიან და მათი პირადი ცხოვრებისა, თუ პოლიტიკური შეხედულებების შესახებ კითხვებს უსვამენ.  ეს პირები თავს სხვადასხვა მედიასაშუალების ჟურნალისტებად წარმოადგენენ და ასახელებენ სააგენტოებს, რომელთა დაფინანსების წყაროების, ან მფლობელების შესახებაც საზოგადოებისთვის ბევრი არაფერია ცნობილი - მათ შორისა KKinfo და “მედია ჯგუფი”.

„ამ ტიპის ქმედებები ძალადობის პროვოცირების პოტენციალს შეიცავს. ერთის მხრივ, ხელი ეშლება პარტიების მიერ პოლიტიკური კამპანიის მშვიდ ვითარებაში ჩატარებას, მეორეს მხრივ, მედია საშუალებების ნორმალურ საქმიანობას.

ბუნებრივია, სხვადასხვა სარედაქციო პოზიციის მქონე ჟურნალისტებს აქვთ უფლება, კრიტიკული შეკითხვები დაუსვან კანდიდატებს, რომლებიც პოლიტიკურ კამპანიას აწარმოებენ, მაგრამ ეს ამოცანა აშკარად განსხვავდება საარჩევნო შეხვედრების ჩაშლის მცდელობისგან“, - აღნიშნულია კომისიის განცხადებაში.

უწყებათაშორისი კომისია ყურადღებას ამახვილებს იმ ფაქტზეც, რომ ჟურნალისტებს აქვთ უფლება, შეკითხვები საკუთარ კოლეგებსაც დაუსვან და კრიტიკულად შეაფასონ მათი საქმიანობა, მაგრამ „ამან ჟურნალისტური საქმიანობის საბოტაჟის სახე არ უნდა მიიღოს“.

ამავე თემაზე:

სახალხო დამცველი სააგენტო „ინფო 9“-ის ჟურნალისტის საქმეს სწავლობს

„იმერვიზიის“ დირექტორი „მაესტროს“ და „ინფო 9“-ს არასწორი ინფორმაციის გავრცელებაში ადანაშაულებს

„ინფო9“-ს დირექტორი ხელისუფლებას რეაგირებას სთხოვს

ეკატერინე დუგლაძე ვარაუდობს, რომ „მედია ჯგუფის“ წევრები ზესტაფონის გამგებლის დავალებას ასრულებენ