ტელერადიო კომპანია „რიონი“ (ქუთაისი)  სატელიტზე გასვლას აგვისტოს ბოლოს გეგმავს. კომუნიკაციებიის ეროვნულ კომისიაში არხის სამაუწყებლო ლიცენზიის მოდიფიცირების შესახებ ზეპირი მოსმენა 27 ივლისს გაიმართა. აქამდე „რიონს“ მხოლოდ საეთერო მაუწყებლობის ლიცენზია ჰქონდა და საკუთარ პროდუქციას ქუთაისსა და მიმდებარე რაიონებში ავრცელებდა.

როგორც არხის ხელმძღვანელმა, თამარ ღვინიანიძემ Media.Ge-ს განუცხადა, სატელიტურ კომპანიებთან მოლაპარაკება ჯერ არ გაუმართავს.

„ვაპირებ შევხვდე „თურქსატისა“ და „ასტრას“ წარმომადგენლებს, გადაწყვეტილებას შემდეგ მივიღებ. ვინდა, რომ როგორც ტელევიზია ისე, რადიო „რიონი“ უფრო ფართო აუდიტორიაზე გავვარცელოთ“, - აღნიშნა თამარ ღვინიანიძემ. მისი თქმით, სატელიტური მაუწყებლობის ლიცენზიით  must carry-ის შესახებ კანონის თანახმად, „რიონის“  ჩართვის ვალდებულება არამხოლოდ ქუთაისის, არამედ მთელი საქართველოს საკაბელო კომპანიებს ექნებათ.

 „რიონი“ გადაცემების დამატებასაც გეგმავს. ტელეკომპანიის ხელმძღვანელი ამბობს, რომ სამაუწყებლო ბადეს დაემატება შუა დღის გადაცემა, რომელიც გასართობ შემეცნებითი იქნება.

„ვამზადებთ კიდევ ერთ გადაცემას სხვა სტუდიასთან. საერთოდ ვცდილობთ, რომ გარდა ჩვენ მიერ წარმოებული პროდუქციისა,  გადაცემები შევისყიდოთ“, - აღნიშნავს თამარ ღვინიანიძე და დასძენს, რომ წინასაარჩევნო პერიოდში იგეგმება თანამშრომლობა ქუთაისში მოქმედ არასამთავრობო ორგანიზაციებთან, რომლებიც არჩევნებიში მონაწილე ქალი კანდიდატების წარმოსაჩენად დებატების გამართვას აპირებენ.

 წინასაარჩევნო პერიოდში „რიონის“ ტოქშოუ „თემა“ პოლიტიკური თემებით უფრო მეტად დაიტვირთება და რეგიონის ყველა პოლიტიკურ სუბიექტს საკუთარი მოსაზრებების წარმოჩენის საშუალებას მისცემს.