ეუთოს წარმომადგენელი მედიის თავისუფლების საკითხებში დუნია მიატოვიჩი  საქართველოში ბოლო პერიოდში ჟურნალისტების მიმართ განხორციელებული ძალადობის გამო შეშფოთებას გამოთქვამს და სამართალდამცავებს ამ შემთხვევების გამოძიებისკენ მოუწოდებს. შესაბამისი განცხადება ეუთომ 16 ივლისს გამოაქვეყნა.

“ჟურნალისტებს უნდა ჰქონდეთ თავისუფლად მუშაობის საშუალება მიუხედავად მათი მედიასაშუალების პოლიტიკური კუთვნილებისა. სამართალდამცველების პასუხისმგებლობის საკითხია, რომ მედიაში მომუშავე პირების პროფესიული მოვალეობის შესრულება მათზე ძალადობის გარეშე უზრუნველყონ”,– აცხადებს მიატოვიჩი.

განცხადებაში აღნიშნულია, რომ 12 ივლისს კარალეთში შეხვედრის დროს ათი ჟურნალისტი დაშავდა. დაშავებულებს შორის იყვნენ სააგენტო info9.ge- ს, ტელევიზიების “მეცხრე არხის” და “თრიალეთის” და “შიდა ქართლის საინფორმაციო ცენტრის” ჟურნალისტები.

ანალოგიური ინციდენტი 26 ივნისს  სოფელ მერეთშიც მოხდა, რა დროსაც დაშავდნენ info9.ge-ს და “მეცხრე არხის” რეპორტიორები. Info9.ge-ს და “თრიალეთის” ჟურნალისტები აცხადებენ, რომ მათ ფიზიკურ და სიტყვიერ შეურაცხყოფას აყენებდნენ ორი თვის მანძილზე, როცა აშუქებდნენ შიდა ქართლში მიმდინარე საზოგადოებისთვის საინტერესო მოვლენებს.

მიატოვიჩი აღნიშნავს, რომ მაისში მან მთავრობას მიაწოდა ინფორმაცია ჟურნალისტების მიმართ განხორციელებული სხვა ძალადობრივი ქმედებების შესაებაც: “მაშფოთებს ასეთი ინციდენტები და ვიმედოვნებ, რომ სამართალდამცველები ძალისხმევას არ დაიშურებენ, რომ აღმოფხვრან ეს საგანგაშო ტენდენცია”.

მიატოვიჩი იმედოვნებს, რომ სასამართლოს მიერ მიღებული გადაწყვეტილება ტელეკომპანია “მაესტროს” 10 ათასი სატელიტური ანტენის დაყადაღების შესახებ ნეგატიურ გავლენას არ იქონიებს მაყურებლების უფლებაზე, თავისუფლად მიიღონ ინფორმაცია.

ამავე თემაზე:

ჟურნალისტებზე ზეწოლის ფაქტები - ბოლო ერთი წლის არასრული სტატისტიკა