ტელეკომპანია “მაესტროს” ხელმძღვანელობა სასამართლოში გაასაჩივრებს გადაწყვეტილებას მისი კუთვნილი 10 ათასი ანტენის დაყადაღების შესახებ.

"დაყადაღების გადაწყვეტილება არის მხოლოდ ვარაუდებზე აგებული. ჩვენ გვაქვს შესაბამისი მტკიცებულებები და საჩივარი, რომელზეც ახლა ვმუშაობთ და შევიტანთ სააპელაციო სასამართლოში. თუმცა, დიდი იმედი არ მაქვს, რომ სააპელაციო სასამართლო ამ ყველაფერს შეცვლის", - აცხადებს ტელეკომპანიის ადვოკატი, დიმიტრი გაბუნია. მისივე განცხადებით, სახელმწიფო აუდიტის სამსახურმა ტელეკომპანია "მაესტროსგან" კოალიცია "ქართულ ოცნებასთან" და ფონდ "ქომაგთან" გაფორმებული სარეკლამო ხელშეკრულებების და ჩარიცხვების შესახებ ინფორმაცია მოითხოვა . 

“ეს გარკვეულ ეჭვს ბადებს, რომ ტელეკომპანია მაესტროს მიმართ მთელი რიგი ქმედებებია დაგეგმილი, რომ მას ხელი შეეშალოს მაუწყებლობაში”- ამბობს გაბუნია.

ტელეკომპანია "მაესტრო" -ს ერთ ერთი დამფუძნებლის, მამუკა ღლონტის განმარტებით, ტელეკომპანია სახელმწიფო აუდიტის სამსახურის მიერ მოთხოვნილ დოკუმენტაციას ამზადებს და  მას დღეს ან ხვალ გადასცემს, მისი თქმით, სარეკლამო ხელშეკრულებებთან დაკავშირებით ტელეკომპანიაში რაიმე უკანონობა გამორიცხულია.  

მთავარმა პროკურატურამ თბილისის საქალაქო სასამართლოს ტელეკომპანია "მაესტროს" მიერ საქართველოში შემოტანილი დიდი ოდენობით ანტენების დაყადაღების შუამდგომლობით  11 ივლისს მიმართა, რაც სასამართლომ დააკმაყოფილა. პროკურატურის ვარაუდით, "მაესტრო" მოსახლეობისთვის ანტენების დარიგებას უსასყიდლოდ აპირებდა, როგორც ეს კომპანია “გლობალ კონტაქტ კონსალტინგის” შემთხვევაში მოხდა.

საქართველოს პროკურატურამ  „გლობალ კონტაქტ კონსალტინგის” დაუმონტაჟებელი ანტენების დაყადაღების გადაწყვეტილება 21 ივნისს მიიღო. ”გლობალ TV"-ს ანტენების მოსახლეობისთვის 10-წლიანი განვადებით გადაცემის გამო, თბილისის საქალაქო სასამართლომ ბიძინა ივანიშვილი 126 მილიონამდე ლარით დააჯარიმა, თუმცა, სააპელაციო სასამართლომ ეს თანხა გაანახევრა.

ტელეკომპანია “მაესტროს” დირექტორი, ილია კიკაბიძე უარყოფს მოსახლეობისთვის ანტენების უსასყიდლოდ გადაცემის ფაქტს და აცხადებს, რომ ანტენები კომერციული მიზნით და ტელევიზიის PR- ისთვის შემოიტანეს.

“ანტენებს არა უსასყიდლოდ, არამედ განვადებით გადავცემდით, თვითღირებულებაზე ბევრად მეტ თანხად ვყიდიდით, რაშიც მოგებას ვნახულობდით. მეორეს მხრივ კი, ეს იყო “მაესტროს” PR-ი რადგან გვინდოდა რაც შეიძლება მეტ ადამიანს ჰქონოდა ჩვენი ყურების შესაძლებლობა”- აცხადებს კიკაბიძე.