„კავკასიის კვლევითი რესურსების ცენტრის“ (CRRC) მიერ ჩატარებული კვლევის „კავკასიის ბარომეტრი 2011“-ის შედეგების მიხედვით, საქართველოს მოსახლობის 45 პროცენტი ინტერნეტს არასდროს იყენებს. ორგანიზაციამ გამოკითხვის შედეგები მიმდინარე წლის 22 ივნისს გამოაქვეყნა. პირდაპირი ინტერვიუს მეთოდით მთელი საქართველოს მასშტაბით 2011 წლის ოქტომბერ-ნოემბერში 2 ათას 287 მოქალაქე გამოიკითხა.

კვლევის თანახმად, ინტერნეტით ყოველ დღე მხოლოდ 28 პროცენტი სარგებლობს. ხუთმა პროცენტმა კი საერთოდ არ იცის რა არის ინტერნეტი. ამ კუთხით 2010 წლის შემდეგ სიტუაცია მნიშვნელოვნად არ შეცვლილა. ორი წლის წინ იგივე კითხვაზე პასუხად გამოკითხულთა 54-მა პროცენტმა განაცხადა, რომ ინტერნეტს არასდროს იყენებს.

ინტერნეტის მომხმარებელთა 62 პროცენტს ინტერნეტი სახლში აქვს. მათგან 44 პროცენტი 18-დან 35 წლამდე ასაკის მოქალაქეა. 

ვინც ინტერნეტით არ სარგებლობს, მათგან 37 პროცენტი მთვარ მიზეზად კომპიუტერის არქონას ასახელებს. 18 პროცენტი ამბობს, რომ ინტერნეტი არ სჭირდება.

გამოკითხულთა 37 პროცენტს პერსონალური კომპიუტერი აქვს. მათგან 90 პროცენტს ინტერნეტზეც მიუწვდება ხელი.  თუმცა, მოქალაქეთა 51 პროცენტს კომპიუტერის საბაზისო ცოდნაც არ გააჩნია. კომპიუტერს საშუალო დონეზე - 22 პროცენტი, ძალიან კარგად კი - 13 პროცენტი ფლობს.

კვლევის შედეგების მიხედვით, ვისაც ინტერნეტთან ხელმისაწვდომობა აქვს, მათგან ონალინ სივრცეს ახალი ამბების მისაღებად მხოლოდ 20 პროცენტი იყენებს. ინფორმაციას ეძებს 49 პროცენტი. ინტერნეტს ძირითადად Facebook-ისთვის იყენებს 28 პროცენტი. სხვა სოციალური ქსელებით სარგებლობს ინტერნეტის მომხმარებელთა 41 პროცენტი, უმეტესად წერილებს გზავნის და ელექტრონულ ფოსტას იყენებს 24 პროცენტი. ორი პროცენტით მეტი (26 %) ფილმებს ან მუსიკას უყურებს და იწერს. ონლაინ თამაშებით კი 14 პროცენტი სარგებლობს. ყველაზე ცოტა - 4 პროცენტი წერს, ან კითხულობს ბლოგებს. 

ამავე თემაზე:

ეს უცნაური ციფრები

საქართველოში ინტერნეტმა, როგორც ინფორმაციის მთავარმა წყარომ, გადაუსწრო ჟურნალ-გაზეთებს - CRRC-ის კვლევა