კამპანიამ „ეს შენ გეხება“ 4 ივნისს თბილისში მეტრო „თავისუფლებასთან“ და „რუსთაველთან“ აქცია გამართა და მოსახლეობას კამპანიის ფარგლებში მომზადებულ ახალ კანონპროექტზე ინფორმაცია მიაწოდა. 

კანონპროექტის თანახმად „მაუწყებლობის შესახებ“ კანონს ემატება მუხლი, რომლითაც  საკაბელო პროვაიდერები ვალდებულნი იქნებიან საერთო ლიცენზიის მქონე უფასო არხები თავიანთ პაკეტში ჩასვან (must carry). თავად ტელეკომპანიებს კი არ შეეძლებათ საკაბელო კომპანიებს მაუწყებლობის ტრანზიტზე უარი უთხრან. გარდა ამისა, განიმარტა ფარული და სოციალური რეკლამის ცნებები, შეიცვალა წინასაარჩევნო პერიოდში რეკლამის განთავსების წესები და ტარიფები.

საინფორაციო ბუკლეტებში, რომელიც კამპანიის წევრებმა მოსახლებას დაურიგეს, განმარტებულია კანონის ახლანდელი ნორმები და ის ცვლილებები, რაც პროექტშია მითითებული. 

საკანონმდებლო წინადადებად კანონპროექტი პარლამენტში 2012 წლის 7 მაისს დარეგისტრირდა. როგორც კამპანიის წევრმა თამარ კორძაიამ Media.Ge-ს უთხრა, ბიურომაც განიხილა, თუმცა საკანონმდებლო ინიციატივის სახე ჯერ არ მისცემია. 

„იმისათვის, რომ პარლამენტმა კანონპროექტი განიხილოს, ჯერ საკანონმდებლო ინიციატივად უნდა დარეგისტრირდეს. სწორედ ამას ვითხოვთ ჩვენც. დღევანდელი აქცია კანონმდებლებისთვის ჩვენი მოთხოვნების კიდევ ერთი შეხსენებაა.  მოსახლეობასაც ვეუბნებით, რომ ეს ცვლილებები მათ ეხებათ“, - აღნიშნა თამარ კორძაიამ.

მისი თქმით, პარლამენტს არ აქვს ვალდებულება საკანონმდებლო წინადადება ინიციატივად აქციოს. თუმცა, კორძაიამ იმედი გამოთქვა, რომ კანონმდებლები კანონპროექტს სერიოზულად მოეკიდებიან და განიხილავენ კიდეც.