სამოცდათორმეტმა მედიასაშუალებამ 22 მაისს პრეზიდენტისა და პარლამენტის თავმჯდომარისადმი მიმართვას ხელი მოაწერა და იმ საკანონმდებლო პაკეტის განხილვა მოითხოვა, რომელიც კამპანიის, „ეს შენ გეხება“ ფარგლებში მომზადდა.

კანონპროექტი  ცვლილებებს რამდენიმე კანონში ითვალისწინებს. „მაუწყებლობის შესახებ“ კანონს ემატება მუხლი, რომლითაც  საკაბელო პროვაიდერები ვალდებულნი იქნებიან საერთო ლიცენზიის მქონე უფასო არხები თავიანთ პაკეტში ჩასვან. თავად ტელეკომპანიებს კი არ შეეძლებათ საკაბელო კომპანიებს მაუწყებლობის ტრანზიტზე უარი უთხრან. გარდა ამისა, განიმარტა ფარული და სოციალური რეკლამის ცნებები, შეიცვალა წინასაარჩევნო პერიოდში რეკლამის განთავსების წესები და ტარიფები.

მიმართვის თანახმად, ამ ცვლილებების მიღების შემთხვევაში ტელეკომპანიებს, განსაკუთრებით რეგიონულ მაუწყებლებს, რომელთა შემოსავლებიც ისედაც ძალზე მწირია, გაუჩნდებათ საარსებო წყარო და უფასო პოლიტიკური რეკლამისთვის გამოყოფილი დრო მძიმე ტვირთად აღარ დააწვებათ.

„საკაბელო ოპერატორებსა და მაუწყებლებს შორის ურთიერთობა სამართლიანად დარეგულირდება და საერთო მაუწყებლობის ლიცენზიის მქონეებს ხელი აღარ შეეშლებათ კუთვნილ სამაუწყებლო ზონებში გავრცელდნენ“, - ნათაქვამია მიმართვაში.

ხელმომწერეები მიიჩნევენ, რომ კამპანიის ფარგლებში შემუშავებული კანონპროექტი საბოლოო ჯამში საარჩევნო გარემოს გაუმჯობესებას ხელს შეუწყობს.

„ეს არის ტესტი ხელისუფლებისთვის. თუ არ მიიღებს კანონპროექტს, ეს ნიშნავს იმას, რომ მას არ სურს გამჭვირვალე არჩევნები“, - განაცხადა ტელეკომპანია „მაესტროს“ ერთერთმა დამფუძნებელმა მამუკა ღლონტმა მიმართვაზე ხელმოწერის დაწყებამდე.

გაზეთ „რეზონანსის“ რედაქტორმა ლაშა ტუღუშმა კი განაცხადა, რომ კანონპროექტს საერთაშორისო ექპერტებიც გაეცნენ და დადებითი შეფასება მისცეს.

ხელმომწერი 72 მედიასაშუალებიდან 26 ტელეკომპანიაა, 24 გაზეთი, 8 ინტერნეტგამოცემა, მედიის საკითხებზე მომუშავე 11 არასამთავრობო ორგანიზაცია და სამი დამოუკიდებელი ჟურნალსიტი - ნინო ჟიჟილაშვილი, თამარ ჩიქოვანი და რეზო საყევარიშვილი.

ხელმომწერებს შორის დედაქალაქის ტელეკომპანიებიდან მხოლოდ „მაესტრო“, „მეცხრე არხი“ და „კავკასიაა“. მიუხედავად იმისა, რომ კანონპროექტის განხილვისას 17 მაისს, საზოგადოებრივი მაუწყებლის სამეურვეო საბჭოს თავმჯდომარე ლევან გახელაძე ცვლილებებს ეთანხებოდა  და მხოლოდ მცირე შენიშვნა ჰქონდა, მიმართვაზე ხელი არ მოუწერია.

კამპანიის მონაწილე მაგდა პოპიაშვილის თქმით, ამ საკითხზე კომუნიკაცია საზოგადოებრივ მაუწყებელთან ვერ შედგა.

„რატომღაც ლევან გახელაძესთან დაკონტაქტება ვერ შევძელი, ამიტომ პასუხი არ ვიცი. შესაძლოა ამ მიმართვას საზოგადოებრივი მაუწყებელიც შეუერთდეს“, - განუცხადა media.ge-ს მაგდა პოპიაშვილმა.

პარლამენტის იურიდიულ საკითხთა კომიტეტის წევრის, ანდრო ალავიძის დაპირებით, კანონპროექტი საკომიტეტო მოსმენაზე განიხილება, რის შემდეგაც გადაწყდება, რომელ ნაწილს გაიზიარებენ კანონმდებლები.