ექვსი წლის წინ შინაგან საქმეთა სამინისტროს სპეცოპერაციის დროს გარდაცვლილი ზურა ვაზაგაშვილის მშობლებმა საზოგადოებრივი მაუწყებლის თვითრეგულირების ორგანოში იჩივლეს. მათ პრეტენზია მაუწყებლის „პირველი არხის“ საინფორმაციო გამოშვება „მოამბის“ 2012 წლის 2 მაისს გასული სიუჟეტის მიმართ აქვთ. მშობლების განცხადებით, სიუჟეტში ნათქვამი ფრაზა - ,,ვაზაგაშვილი შეიარაღებული დაჯგუფების წევრი იყო“,  სინამდვილეს არ შეესაბამება.

ზურა ვაზაგაშვილის მშობლები საზოგადოებრივი მაუწყებლის თვითრეგულირების ორგანოში წარდგენილ საჩივარში გავრცელებული ინფორმაციის უარყოფას მოითხოვენ. მათ ინტერესებს „ახალგაზრდა იურისტთა ასოციაციის“ „ქართული მედიის სამართლებრივი დაცვის ცენტრის“ იურისტები დაიცავენ.