სამოქალაქო სოლიდარობის აქციას, რომელიც 31 მარტს, თბილისის ექვს მოედანზე ერთდროულად გაიმართა, ქუთაისის ცენტრალურ პარკში შეკრებილი მედიისა და არასამთვარობო სექტორის წარმომადგენლებიც შეუერთდნენ.

აქცია სიმბოლურ ხასიათს ატარებდა. ის მიზნად ისახავდა სამოქალაქო პოზიციისა და სოლიდარობის გამოხატვას საზოგადოებისთვის მნიშვნელოვანი ექვსი თემის მიმართ: ადამიანის უფლებები, განათლება, უსაფრთხო გარემო, თავისუფალი მედია, სამართლიანი არჩევნები, კულტურული მემკვიდრეობა.

ქუთაისში აქცია, "ახალი გაზეთის" ორგანიზებით მოეწყო.

“ჩვენ გვინდოდა სიმბოლურად, ქუთაისიც შეერთებოდა იმ აქციებს, რომლებიც თბილისში იმართება. ცუდი ამინდის მიუხედავად რაღაც ნაწილი სამოქალაქო სექტორისა და მედიის წარმომადგენლებისა შეიკრიბნენ. იმედია, ამას არ ექნება ერთჯერადი ხასიათი. ამ ტიპის მშვიდობიანი, სოლიდარული აქციებით გვინდა საზოგადოებას ყურადღება მივაქცევინოთ ისეთ მნიშვნელოვან თემებზე, როგორიცაა: კულტურული მემკვიდრეობის დაცვა, ადამიანის უფლებები, განათლება და ჯანნდაცვა“, - განაცხადა „ახალი გაზეთის“ მთავარმა რედაქტორმა ია ბობოხიძემ Media.Ge-სთან საუბრისას.