17 თებერვალს პარლამენტმა  საქართველოს საზოგადოებრივი მაუწყებლის“ (GPB) მეურვის პოსტზე ნატალია დვალი დაამტკიცა. ის 2011 წლიდან არასამთავრობო ორგანიზაცია „სამოქალაქო ინიციატივის დამფუძნებელი და მისი წევრია. 2010 წლიდან კი - არასამთავრობო ორგანიზაცია „ახალი ხედვა საქართველოს“ წევრი. ნატალია დვალი ამავე დროს ინგლისური ენის საგანმანათლებლო ცენტრის, „British House“-ის დირექტორიცაა.

სამეურვეო საბჭოს წევრობის კანდიდატებად პრეზიდენტმა პარლამენტს ლევან ნიჟარაძე, ნიკოლოზ ნარსია და ნატალია დვალი  წარუდგინა.

საინფორმაციო სააგენტო „ინტერპრესნიუსის“ ინფორმაციით, 1979 წელს დაბადებული ნიკოლოზ ნარსია 2008-2010 წლებში საქართველოს თავდაცის სამინისტროს ეროვნული გვარდიის დეპარტამენტის სამაშველო სამსახურში მუშაობდა, 1981 წელს დაბადებული ლევან ნიჟარაძე კი -  2005 წლიდან 2011 წლის აგვისტომდე შპს "ლოგოს" პროექტის მენეჯერად. ლევან ნიჟარაძე ამჟამად საკანონმდებლო ორგანოში მუშაობს . ის პარლამენტის იურიდიულ საკითხთა კომიტეტის თავმჯდომარის, პავლე კუბლაშვილის თანაშემწეა. ეს ინფორმაცია მან Media.Ge-ს გასულ კვირას დაუდასტურა.

როგორც ნატალია დვალმა media.ge-ს  განუცხადა, მას მედიაში მუშაობის გამოცდილება არ აქვს და სამეურვეო საბჭოში მოღვაწეობა მისთვის „ერთგვარი გარდატეხაა“. მაუწყებელთან დაკავშირებით დვალს ასეთი ხედვა აქვს:

„კარგი იქნება თუ საზოგადოებრივი მაუწყებელი გაამყარებს  კავშირს ევროპის წამყვან სატელევიზიო კორპორაციებთან, ვფიქრობ რომ ჩვენ ამ მხრივ უნდა ავიღოთ ორიენტირი“, - განაცხადა დვალმა.

საქართველოს საზოგადოებრივი მაუწყებლის“ (GPB) მეურვის პოსტის დასაკავებლად პრეზიდენტის ადმინისტრაციაში 4 კანდიდატი დარეგისტრირდა: ნატალია დვალი, ვაჟა წოწკოლაური, ლევან ნიჟარაძე და ნიკოლოზ ნარსია, თუმცა პრეზიდენტმა პარლამენტს  დასამტკიცებლად 3 წარუდგინა. ვაჟა წოწკოლაურის კანდიდატურა პრეზიდენტმა საკანონმდებლო ორგანოში აღარ წარადგინა. ის პარლამენტში ფრაქცია „ერთიანი ნაციონალური მოძრაობის“ აპარატის მოწვეული სპეციალისტია.

სამეურვეო საბჭოს წევრის ადგილზე კონკურსი მას შემდეგ გამოცხადდა, რაც ეს პოსტი ჟურნალ „ლიბერალის“ მთავარმა რედაქტორმა, შორენა შავრდაშვილმა დატოვა. პრეზიდენტის განკარგულებით კონკურსი 2011 წლის 27 ოქტომბერს დაიწყო, თუმცა ეს კონკურსი ჩაიშალა და ხელახლა 2012 წლის 9 იანვარს გამოცხადდა.