საგარეჯოს ტელეკომპანია „თვალს“ ლიცენზიის მოდიფიცირება და საერთო მაუწყებლიობის ნაცვლად სპეციალიზირებული (გასართობი) მაუწყებლობის ლიცენზია სურს. კომუნიკაციების ეროვნულმა კომისიამ საჯარო ადმინისტრაციული წარმოება 17 აპრილს დაიწყო.

კომისიამ „თვალი“ მიმდინარე წლის 12 მარტს დეკლარაციის და წლიური ანგარიშების წარუდგენლობის გამო გააფრთხილა. გაფრთხილებასთან ერთად, მაშინ კომისიამ „თვალს“ მოთხოვნილი დოკუმენტაცის წარდგენა დაავალა. ამ დრომდე „თვალს“ვებ გვერდი არ შეუქმნია, დეკლარაცია კი დაგვიანებით წარადგინა.

„თვალის“ მიერ მაუწყებლობის შეწყვეტის შესახებ ინფორმაცია მედიაში არაერთხელ გავრცელდა. ამის შესახებ განცხადება „რეგიონულ მაუწყებელთა ასოციაციამაც“ (GARB) გაავრცელა. მათ მიერ 2010 წლის ნოემბერში ჩატარებული კვლევის თანახმად, ტელეკომპანიის მაუწყებლობა მეპატრონის სურვილით შეწყდა.

GARB -ის აღმასრულებელი დირექტორის ნათია კუპრაშვილი ადასტურებს, რომ „თვალი“ უკვე 7 წელია აღარ მაუწყებლობს, რის გამოც მას ასოციაციის წევრის სტატუსი შეუწყვიტეს.

„მაუწყებლობის შესახებ“ კანონის 74-ე მუხლის თანახმად, ლიცენზიით გათვალისწინებული საქმიანობის შეწყვეტა წელიწადში ზედიზედ 3 თვეზე მეტი ვადით ლიცენზიის გაუქმების საფუძველია.