სახალხო დამცველმა სოზარ სუბარმა 28 იანვარს ტელეეეთერში განაცხადა, რომ ის მიმართვას გაუგზავნის პრეზიდენტ მიხეილ სააკაშვილს და ტელეკომპანია "202"-ის (დაიხურა 2006 წლის შემოდგომაზე) თანადამფუძნებლის, ჟურნალისტ შალვა რამიშვილის შეწყალებას თხოვს.

ტელეკომპანია "რუსთავი 2"-ის ეთერში სახალხო დამცველმა განაცხადა, რომ შალვა რამიშვილი, რომელმაც ქართულ ჟურნალისტიკაში ეპოქა შექმნა, არ წარმოადგენს საზოგადოებისთვის საშიშ ფიგურას, თან მან უკვე მოიხადა სასჯელის ნახევარი. დღესვე შალვა რამიშვილის მეუღლე და სახალხო დამცველის წარმომადგენელი პატიმართან შეხვედრის მოთხოვნით სასჯელაღსრულების დეპარტამენტსაც მიმართავენ.

რამიშვილი 2005 წლის 27 აგვისტოს დააკავეს, პარლამენტარ კობა ბექაურისთვის ფულის გამოძალვის ბრალდებით. მასთან ერთად დააპატიმრეს "202"-ის კიდევ ერთი დამფუძნებელი დავით კოხრეიძე. თბილისის საქალაქო სასამართლომ 2006 წლის 29 მარტს რამიშვილს 4 წლით, კოხრეიძეს კი 3 წლით თავისუფლების აღკვეთა მიუსაჯა. დავით კოხრეიძე პრეზიდენტმა გასულ წელს შეიწყალა.