2012 წლის ბოლომდე ქალაქის ყველა უბანი უფასო, უსადენო ინტერნეტით დაიფარება- წერს გაზეთი “24 საათი”.

გაზეთის ცნობით,პროექტის განხორციელების შემდეგ, რომელსაც თბილისის მერია ასრულებს, ინტერნეტით სარგებლობა ქუჩებში, სკვერებში, უმაღლეს საგანმანათლებლო დაწესებულებებში, მანქანაში, ავტობუსში და მეტროში გახდება შესაძლებელი. ამჟამად უფასო-უსადენო ინტერნეტით სარგებლობა დავით აღმაშენებლის გამზირზე, აბანოთუბანში, თავისუფლების მოედანზე, გლდანსა და ვარკეთილში შეუძლიათ მომხმარებლებს. ინტერნეტით სარგებლობისთვის მომხმარებლებმა უნდა მოძებნონ ქსელი სახელწოდებით “Tbilisi Loves You”.

“24 საათი” წერს, რომ ქალაქის უსადენო ინტერნეტი არ არის გათვლილი დიდი მოცულობის ფაილების გასაგზავნად, მისი გამოყენება ფოსტის და სოციალური ქსელების ანგარიშის შესამოწმებლად და გასაახლებლად იქნება შესაძლებელი. გაზეთი აღნიშნავს, რომ ამ ფაქტის გამო, “მცირე ზარალი მიადგება ინტერნეტპროვაიდერებს, თუმცა, სავარაუდოდ შესამჩნევად მოიკლებს მობილური ინტერნეტის მომხმარებელთა რაოდენობა”.

პროექტს კონკურსში გამარჯვებული კომპანია “დელტაკომი” ახორციელებს, რომლის კომერციული დირექტორის, დავით ხუბულურის თქმით, პროექტის ღირებულება 14 მილიონ დოლარს გადააჭარბებს, რასაც აუქციონში გამარჯვებული კომპანია აფინანსებს. ინტერნეტის მაქსიმალური სიჩქარე 120 მეგაბაიტი იქნება, ერთი ადამიანი 1.4 მეგაბაიტი სიჩქარით სარგებლობას შეძლებს.