გაზეთი „ალიას“ ინფორმაციით, ვისაც სურს „გლობალ TV”-ს ანტენების დამონტაჟებაზე იმუშაოს, განცხადება ოპოზიციური პოლიტიკური პარტია „ქართული ოცნების“ ოფისში უნდა დაწეროს. „მეტიც, მოსახლეობაში ვრცელდება მოსაზრება, რომ ვისაც ანტენის დადგმა უნდა „ქართულ ოცნებაში“ უნდა გაწევრიანდეს“, - ნათქვამია „ალიას“ 10 მაისის ნომერში დაბეჭდილ მასალაში. თუმცა მოსახლეობაში გავრცელებული მოსაზრების წყარო სტატიაში დასახელებული არ არის.

სწორედ „გლობალ TV“-ს საშუალებითაა შესაძლებელი ტელეკომპანია „მეცხრე არხის“ ყურება, რომელიც „ქართული ოცნების“ ლიდერის ბიძინა ივანიშვილის მეუღლეს ეკუთვნის. თავად "გლობალ TV"-ს ერთერთი მფლობელი ბიძინა ივანიშვილის ძმა, ალექსანდრე ივანიშვილია.

„ალიასთან“ საუბრისას „ქართული ოცნების“ გურიის კოორდინატორი სოსო ბოლქვაძე ადასტურებს, რომ ანტენის დამონტაჟების მსურველებმა პარტიის ოფისს უნდა მიმართონ.

„უკვე 1500-ზე მეტი განცხადება შემოვიდა ჩვენთან. ჩვენ მხოლოდ დავეხმარეთ იმ ადამიანების შერჩევაში, რომლებსაც შეუძლიათ მონტაჟზე იმუშაონ. მალე გაიხსნება წარმომადგენლობა და იქ მოხდება შეკვეთების მიღება. ადგილობრივებთან ერთად დამონტაჟებაზე თბილისელი სპეციალისტებიც იმუშავებენ,“ - აღნიშნავს სოსო ბოლქვაძე.