ტელეკომპანია „მაესტროს“ ერთ-ერთი დამფუძნებელი მამუკა ღლონტი უკმაყოფილოა იმ ფაქტით, რომ „მეცხრე არხისა“ და „მაესტროს“ საინფორმაციო გამოშვება ერთმანეთს ემთხვევა. ამის შესახებ გაზეთი „რეზონანსი“ 27 აპრილის ნომერში წერს.

მამუკა ღლონტი მიიჩნევს, რომ „მეცხრე არხის“ მთავარი საინფორმაციო გამოშვების 21 საათზე გაშვება კონკურენციას „მაესტროს“ გაუწევს და არა ტელეკომპანია „რუსთავი 2“-ს.

„გავიგე, რომ „მეცხრე არხი“ მთავარ სანფორმაციოს 21 საათზე ათავსებს, ვფიქრობ, სერიოზული შეცდომაა მათი მხრიდან. „მაესტროს“ მეტი კონკურენტი არ ჰყავთ? თუმცა, მესმის, რომ კონკურენციას მხოლოდ სიკეთე მოაქვს და ვიღებ ამ გამოწვევას“, - ამბობს ღლონტი. მისი აზრით, ყველაზე კარგ სიტუაციაში ტელეკომპანია „იმედის“ საინფორმაციო გამოშვება „ქრონიკა“ რჩება, რომელიც 20 საათზე გადის.

„მეცხარე არხის“ გენერალური დირექტორი კახა ბექაური კი მიიჩნევს, რომ მისი „მაესტროს“ მაყურებელს არ წაართმევენ.

„ეს გადაწყვეტილება მივიღეთ იმიტომ რომ „რუსთავი 2“-ის საინფრომაციო გამოშვება „კურიერი“ გადის 21 საათზე. დღევანდელი ჩვენი მედიასივრცე ფაქტობრივად პრიპაგანდას მიაქვს, ამ პროპაგანდის მთავარი ლოკომოტივი კი „რუსთავი 2“-ს 9 საათიანი კურიერია. ამიტომ ჩვენი სამიზნე არის 9 საათიანი კურიერი და არა რომელიმე სხვა გამოშვება“, - ამბობს ბექაური „რეზონანსთან“ საუბრისას.