გაზეთ „ალიას“ ცნობით, ტელეკომპანია „მეცხრე არხი“ მაუწყებლობას 2012 წლის 30 აპრილს, საღამოს 9 საათზე,  დაიწყებს. ამ ინფორმაციას ადასტურებს არხის გენერალური დირექტორი კახა ბექაურიც. მისი თქმით, რამდენიმე თვის განმავლობაში საცდელი მაუწყებლობა იქნება, შემდეგ კი სრული სამაუწყებლო ბადით გავლენ ეთერში.

საწყის ეტაპზე, ყოველ დღე,  საინფორმაციო გამოშვება დღეში სამჯერ გავა. დღის გამოშვებებს სამ და ექვს საათზე სოფო ჩაკვეტაძე წაიყვანს, რომელიც უწინდელ „მეცხრე არხზე“ მუშაობდა. მთავარ გამოშვებას,  საღამოს 9 საათზე, ნათია ლაზაშვილი გაუძღვება. ის წლების განმავლობაში ტელეკომპანია „რუსთავი 2“-ის სახე იყო.

საღამოს 10 საათზე ეთერში გავა  გოგი ახალკაცის ტოქშოუ. 23 საათზე კი ეთერში თოჯინური პოლიტიკური სატირა „ინ+ფაქტი“ გავა, რომელსაც შალვა რამიშვილის სტუდია მოამზადებს. დანარჩენი ეთერი ფილმებით შეივსება.

როგორც კახა ბექაურმა Media.ge-ს 23 აპრილს განუცხადა, „მეცხრე არხი“ აშშ-ს FOX NEWS-ის მსგავსი საინფრომაციო ტელეკომპანია იქნება. სამაუწყებლო ბადე მთლიანად საინფრომაციო გამოშვებებისა და ტოქშოუებით შეივსება. სრულად დაფარავენ რეგიონებსაც. დედაქალაქის გარეთ, მთელ საქართველოში, შეიქმნება 40-მდე ბიურო, სადაც დაახლოებით 45 გადამღები ჯგუფი იმუშავებს.

"მეცხრე არხის" ყურება "გლობალ tv"-სა და "მაგთისატის" აბონენტებს შეეძლებათ, აგრეთვე მოსახლეობის იმ ნაწილს, რომელიც სატელიტური თეფშის საშუალებით იღებს სხვა ქართულ არხებს.