გაზეთი „ვერსია“ 6-8 აპრილის ნომერში საკაბელო კომპანია "გლობალ TV"-ს გარშემო შექმნილ პრობლემებზე წერს. გაზეთის ინფორმაციით, საკაბელო კომპანია „გლობალ ტვ“-ს მაუწყებლობიდან ტელეკომპანია „იმედი“ და „რუსთავი 2“ მათი ხელმძღვანელობის მოთხოვნის საფუძველზე გაქრა. „ვერსიის“ ცნობით, „რუსთავი 2“-მა თანამშრომლობა „კავკაზუს TV“-სთან გააგრძელა, „იმედმა“ „ბლექსი სატთან“ გააფორმა კონტრაქტი.

„ვერსიის“ ცნობით“  „გლობალის“ პაკეტში ჩასმაზე უარი განაცხადეს ტელეკომპანია „მზემ“ და „საქართველომაც“.

„ვერსიასთან“ საუბრისას, „გლობალ TV“-ს ხელმძღვანელობა ამბობს, რომ  ხელისუფლება საკაბელო ბაზრიდან კომპანიის გაქრობას ცდილობს და რომ  ზეწოლა სამაუწყებლო პაკეტში “მეცხრე არხის” ჩართვას უკავშირდება. მათი ინფორმაციით, „მეცხრე არხი“ ეთერში რამდენიმე დღეში გავა.

“გლობალ TV” -ს მარკეტინგის დირექტორი, ზურაბ ბაზლიძე „ვერსიასთან“ საუბრისას აცხადებს, რომ მთავარი პრობლემა, რომელსაც კომპანიას უქმნიან მაუწყებლობისთვის აუცილებელი აპარატურის დაზიანებაა.

„საბაჟო არარეალურ შეფერხებებს გვიქმნის საქართველოში ჩვენ საკუთრებაში არსებული აპარატურის შემოსატანად. დაზიანებულია აპარატურის უდიდესი ნაწილი და შეკეთებას აღარ ექვემდებარება. ჩვენი ყველა ტვირთი “წითელ დერეფანში” გადის და მისი განბაჟება ხშირად 20-23 დღე გრძელდება“ ამბობს ბაზლიძე და განმარტავს: „რამდენიმე დღის წინ სიგნალის მისაღებად დასამაგრებელი 11 ათასი თავაკი ჩამოგვივიდა, რომელთა 90% უვარგისი აღმოჩნდა. ფიზიკურად შეუძლებელია ეს რაოდენობა წუნიანი იყოს“.

„გლობალ TV“ პრობლემების მოგვარებას ამერიკის საელჩოსთვის მიმართვით და სიტუაციის გაცნობით გეგმავს.

„გლობალ TV”-ის ერთერთი მფლობელი ბიძინა ივანიშვილის ძმა ალექსანდრე ივანიშვილია. კომპანიის კიდევ ერთი მფლობელი ამერიკელი ალექს როზენ ჰესია. თავის მხრივ, ბიძინა ივანიშვილს უკავშირდება ახლადშექმნილი ტელეკომპანია "მეცხრე არხი", რომელსაც ივანიშვილის მეუღლე, ეკატერინა ხვედელიძე ფლობს.