“8 თებერვლის “რეზონანსი” გუშინ ხონში არ იყიდებოდა და, როგორც ადგილობრივები ამბობენ, ყველა ეგზემპლარი, რაც კი ხონში ჩავიდა, გამგეობამ შეიძინა”, - წერს გაზეთი “რეზონანსი” 9 თებერვლის ნომერში და ადგილობრივებზე დაყრდნობით განმარტავს, რომ ეს იმ სტატიის გამო მოხდა, რომელიც გაზეთის 8 თებერვლის ნომერში გამოქვეყნდა.

სტატიაში საუბარი იყო ხონში “ნაციონალების” ადგილობრივი ორგანიზაციის ხელმძღვანელის, ლევან ბობოხიძის შესახებ,  რომელიც პარლამენტარ აკაკი ბობოხიძის ძმაა. “რეზონანსი” წერს, რომ ლევან ბობოხიძე ხელქვეითების მეშვეობით საბიუჯეტო ორგანიზაციებში დასაქმებულებისგან ყოველთვე ხელფასის 15-20%-ს იღებს და მას “პარტიული საქმიანობისთვის” ანაწილებს.

“რეზონანსი” განმარტავს, რომ ინფორმაცია ლევან ბობოხიძის საქმიანობის შესახებ, ადგილობრივ გაზეთში მის ინტერვიუზე დაყრდნობით, პირველად “პრესაჯი.ტვ”-მ გამოაქვეყნა. ინტერვიუში ლევან ბობოხიძე ამ ფაქტს ადასტურებდა და ამბობდა, რომ ვინც ფულს არ გადაიხდის, მას სამსახურიდან გაათავისუფლებდნენ.

“იგი ამაში კანონდარღვევას ვერ  ხედავს და უკვირს, ადამიანი სამსახურს რომ იშოვის, ხელფასის ნაწილის გადახდაზე უარი როგორ უნდა თქვას”, - წერს “რეზონანსი” და ინტერვიუს ამ ნაწილს ლევან ბობოხიძესთან აქვეყნებს.