გაზეთი „მთელი კვირა“ 30 იანვრის ნომერში „თავისუფალი პრესის მხარდაჭერის ორგანიზაციის“ 2011 წლის ფინანსურ ანგარიშს აქვეყნებს. ამ ეტაპზე ორგანიზაციის ძირითადი დამფინანსებელი ფონდი „ქართუა“, რომლისგანაც მან 131 ათას 70 ლარი გრანტის სახით მიიღო. 2 ათასი ლარი "თავისუფალი პრესის მხარდაჭერის ორგანიზაციას" გაზეთმა „კვირის პალიტრამ“, 500 ლარი კი გაზეთმა „ახალმა თაობამ“ შემოწირულობის სახით გადაურიცხა. მოქალაქეთა მიერ  გადარიცხულმა თანხამ კი 120 ლარი შეადგინა.

ფინანსური ანგარიშის მიხედვით, ფონდ „ქართუს“ გრანტით დაფინანსდა ორგანიზაციის მატერიალურ-ტექნიკური ბაზით უზრუნველყოფა, რაც სათაო ოფისისა და ლოჯისტიკის ცენტრებისათვის ფართის დაქირავებას, ოფისების ავეჯითა და კომპიუტერული ტექნიკით აღჭურვას ითვალისწინებდა. ამავე თანხით შეიძინეს ორი ავტომანქანა, დაამზადეს მოძრავი სტენდ-ურიკები, სტაციონარული სტენდი და სტენდი ველოსიპედები პრესის რეალიზაციისთავის. შეარჩიეს თანამშრომლები, ჩაუტარეს ტრენინგები, რეალიზატორებს კი სპეციალური ქურთუკები და ქუდები შეუძინეს.