ამერიკის შეერთებული შტატების ელჩი საქართველოში, რიჩარდ ნორლანდი,  ტელეკომპანია TV 3-ის ჟურნალისტების დაკავების ფაქტს გამოეხმაურა.

საინფორმაციო სააგენტო „ინტერპრესნიუსის“ მიერ გავრცელებული ინფორმაციით, ნორლანდი დარწმუნებულია, რომ საქართველოს ხელისუფლება და ევროკავშირის სადამკვირვებლო მისია აქტიურად ჩაერთვება და დაკავებული ჟურნალისტების გათავისუფლებას უზრუნველყოფს. ნორლანდის თქმით, როგორც მისთვის არის ცნობილი, ეს თემა საქართველოს პრემიერ-მინისტრის სპეციალური წარმომადგენლის - ზურაბ აბაშიძისა და რუსეთის საგარეო საქმეთა მინისტრის მოადგილის - გრიგორი კარასინის შეხვედრაზეც იქნება განხილული. შეხვედრა დღეს, 16 აპრილს პრაღაში უნდა გაიმართოს.

რიჩარდ ნორლანდმა ისიც აღნიშნა, რომ ევროკავშირის სადამკვირვებლო მისიამ ცხინვალთან აამოქმედა ცხელი ხაზი, რომლის მეშვეობითაც ისინი ჟურნალისტების გათავისუფლებას ცდილობენ.

TV3-ის ჟურნალისტი ბელა ზაქაიძე, ოპერატორი ვახტანგ ლეკიაშვილი და ტექნიკური თანამშრომელი მიხეილ მიხოევი გორის რაიონში სოფელ აძვთან 15 აპრილს დაკავეს. გადამღები ჯგუფი გორის მუნიციპალიტეტის სოფელ აძვში საზღვრის პრობლემებზე ამზადებდა მასალას.